Presidenti i Serbisë, Aleksandar Vuçiq, ka deklaruar se Serbia nuk do ta njohë pavarësinë e Kosovës, duke theksuar se askush nuk duhet të ketë iluzione për këtë çështje.

“Edhe sot, përgjigjja ime është e njëjtë: mos mbani shpresa për këtë, kjo nuk do të ndodhë”, tha Vuçiq, sipas gazetës serbe Novosti.

Duke komentuar deklaratat e ish-kryeministrit të Kosovës, Avdullah Hoti – i cili e kishte cilësuar moszbatimin e marrëveshjes së Uashingtonit si një “mundësi të humbur për Kosovën” – presidenti serb u shpreh se marrëveshja kishte karakter ekonomik, por sipas tij, Kosova nuk kishte respektuar asnjë nga pikat e saj.

“Unë e kam refuzuar pjesën e tyre politike, e cila nuk kishte lidhje me ekonominë. Ata nuk kanë zbatuar asnjë marrëveshje, por problemi im nuk është me ta. Kjo ishte një marrëveshje ekonomike dhe ata nuk e kanë respektuar”, deklaroi Vuçiq.

Ai shtoi se me ardhjen në pushtet të administratës së Joe Biden në SHBA, është tentuar të promovohen marrëveshje të reja, duke anashkaluar marrëveshjen e Brukselit.

“Kjo nuk do të funksionojë. Marrëveshja e Brukselit do të duhet të zbatohet dhe Asociacioni i Komunave me Shumicë Serbe duhet të formohet. Në të kundërtën, ajo që po ndodh është vetëm ushtrim i dhunës dhe forcës së zhveshur”, tha presidenti serb.