Me tre muaj burg dhe 200 euro gjobë është dënuar Skender Bardhecaj, i akuzuar se kishte vjedhur një paletë me vaj

Shpallja e aktgjykimit është bërë të martën nga gjykatësi Ertan Sejfulla, pasi që paraprakisht, në seancën fillestare të mbajtur të hënën, Bardhecaj e kishte pranuar fajësinë për veprën penale të vjedhjes

Siç tha gjykatësi Sejfullah, me pëlqimin e të akuzuarit, dënimi prej tre muaj burgim mund të zëvendësohet në dënim me gjobë me lartësi prej 200 euro.

Po ashtu, i akuzuari u obligua që të paguaj 30 euro në emër të paushallit gjyqësor dhe 30 euro në fondin për kompensimin e viktimave të krimit.

Sipas aktakuzës së ngritur me 2 gusht 2018, nga Prokuroria Themelore në Prishtinë, Skender Bardhecaj akuzohet se ka kryer veprën penale “vjedhje” nga neni 325, paragrafi 1 të Kodit Penal, vepër kjo e dënueshme me gjobë dhe me burgim deri në tre vjet.

Sipas aktakuzës, më 23 dhjetor 2017, në një depo në Fushë Kosovë, Bardhecaj, i punësuar në pozitën e vozitësit, ka marrë një paletë me vaj, me qëllim të përvetësimit të kundërligjshëm për vete.

Në aktin akuzues thuhet se kompanisë në fjalë i ka shkaktuar dëm në vlerë prej 766.57 euro. Këtë shumë thuhet se ai e ka paguar, pasi është detyruar nga kjo kompani. /BetimipërDrejtësi