Vlora Çitaku i reagon ministres Gërvalla pasi tha se nuk duhet fajësuar BE-në për gabimet tona

18:57 | 10 Korrik 2021
Arditë Shkodra

Ish-ambasadorja e Kosovës në SHBA i ka reaguar ministres së Jashtme, Donika Gërvalla për fjalën e saj sot në Forumin e Dubrovnikut lidhur me liberalizimin e vizave për Kosovën.

Në këtë forum, Gërvalla ka deklaruar se Kosova duhet t’i bëjë detyrat e shtëpisë duke luftuar krimin dhe korrupsionin, ndërsa nuk duhet ta fajësojë Bashkimin Evropian për gabimet e veta.

Pas kësaj deklarate reagoi Çitaku, e cila thotë se Ministri i Punëve të Jashtme të Gjermanisë ka konfirmuar atë që e kanë konfirmuar Komisioni dhe Parlamenti Evropian se Kosova ka përmbushur kriteret për liberalizim vizash.

Ndër të tjera, ajo tha se detyra e Gërvallës është ta paraqes Kosovën në dritën e saj më të mirë.

Postimi i saj i plotë:

E nderuara Ministre,

Para pak javësh në Prishtinë, Ministri i Punëve të Jashtme të Gjermanisë konfirmoi atë të cilën Komisioni Evropian dhe Parlamenti Evropian po e përsërisin tani e disa vite: Kosova ka përmbushur të gjitha kriteret për liberalizimin e vizave.

Keni parasysh, qytetarët e Venezuelës, Kolumbisë e shumë të tjerë deri në Taiwan mund të udhëtojnë pa viza në BE.

Askush nuk po thotë se Kosova është gati sot të jetë anëtare e BE-së, sepse ne kemi ende për të bërë në luftën kundër korrupcionit, në sundimin e ligjit dhe në përjetësimin e vlerave evropiane.

Por, ta keni të qartë, as brenda BE-së nuk ka uniformitet në zbatimin e vlerave dhe standardeve. Jo të gjitha vendet e BE-së janë në nivelin e Finlandës apo Suedisë.

Por, mbi të gjitha, ju jeni Ministre e Jashtme e Kosovës. Detyra e juaj është ta plasoni Kosovën në dritën e saj më të mirë. Jo të mos e thoni të vërtëtën, por as mos ta shtrembëroni atë.