Një person është arrestuar pas një vjedhjeje të rëndë në rrugën “Mustafë Xhigolli” në Ferizaj, ku janë marrë stoli ari në vlerë rreth 10,000 euro dhe pajisja DVR e kamerave të sigurisë.

Policia Rajonale e Ferizajt njofton se ngjarja ndodhi më 30 tetor rreth orës 22:00.

Njësitë hetimore dhe forenzike dolën menjëherë në vendngjarje, ku dyshohet se autori kishte depërtuar në shtëpi përmes thyerjes së xhamit të dritares së pasme.

“Njësitë e hetimeve rajonale dhe forenzikës kanë dalë menjëherë në vendin e ngjarjes. Nga ekzaminimet fillestare është dyshuar se personi/na të panjohur kishin depërtuar në shtëpinë e viktimës përmes thyerjes së xhamit të dritares së pasme, duke vjedhur stoli ari në vlerë rreth 10.000 euro, si dhe pajisjen DVR të kamerave të sigurisë. Gjatë zhvillimit të hetimeve, njësia hetimore ka identifikuar një automjet të dyshuar të tipit Audi A4, ngjyrë hiri, që drejtohej nga A. Xh.( 25 vjeç) .Gjatë kontrollit në automjet janë gjetur mjete të dyshimta, përfshirë një shpues elektrik dhe një palë këpucë, të cilat përputhen me gjurmët e lëna dhe pamjet nga kamerat e sigurisë nga kryesi i veprës”, thuhet në njoftim.

I dyshuari ka tentuar të largohet, por pas një ndjekjeje është arrestuar nga hetuesit policorë.

Me urdhër të prokurorit të rastit, i dyshuari është ndaluar për 48 orë, ndërsa automjeti është sekuestruar për procedura të mëtejshme hetimore./Arbresh.info