Vazhdimi i seancës së sotme nisi pas 50 minutave, e në seancë ishin vetëm 20 deputetë. Deputetët e pranishëm thanë se të tjerët më të rëndësishëm e kanë ta shikojnë Kampionatin Botëror se sa të marrin pjesë në seancë.

Pas zgjedhjes së tre emrave për gjyqtarë të Gjykatës Kushtetuese, në Kuvend u pajtuan që të kthehen në orën 16:00.

Deputeti Korab Sejdiu, tha se duhet të vazhdohet seanca të hënën, për shkak të mungesës serioze të deputetëve.

“Debati me 20 deputetë është goxha kot”, tha Albulena Haxhiu e VV’së.

Shefi i Grupit Parlamentar i PSD’së, e ka lidhur mungesën e deputetëve me ndeshjet e kampionatit Botëror.

“Siç duket kampionati botëror po bëhet më i rëndësishëm se sa parlamenti i Republikës së Kosovës”, ka thënë Sejdiu.

“Është për keqardhje që numri i deputetëve është minimal”, tha ai.

Edhe deputetja e AAK’së, Teuta Haxhiu tha se për deputetët më e rëndësishmë po është futbolli, por ajo ishte që të vazhdojë seanca.

Bilall Sherifi tha se futbolli nuk është arsyeja e mungesës së 100 deputetëve.

“Pra nuk është arsyeja futbolli, së paku unë kështu e shoh se nga 27 sa ka LDK, veç Korabi qenka këtu, kjo i bije që LDK krejt futbollista”, tha ai.