Si skandaloze po vlerësohet veprimi i fundit i EULEX-it, ku gjyqtarë të saj kanë marrë vendime pa qenë të dekretuar në Gjykatën e Apelit.

Një rast i tillë është gjyqtari Manuel Soares, që së paku në rastin e njohur “Kleçka” ka marrë vendime dhe veprime procedurale, raporton KTV.

Punën në Gjykatën e Apelit e ka kryer ai nga muaji prill deri në nëntor, kur EULEX-i i kishte kërkuar të pushojë deri në dekretim. Njohësit e sistemit gjyqësor thonë se kjo tregon brishtësinë e sistemit të drejtësisë në përgjithësi, duke lënë fajtor këtu edhe Këshillin Gjyqësor të Kosovës.

Vendimet që janë marrë nga këta gjyqtarë mund të mos pranohen nga palët.

EULEX-i, sipas Petrit Zogajt të FOL-it, është bërë imun në skandale, përcjell koha.net. Aq shumë, sipas tij, sa që nuk po ka më reagime as nga Bashkimi Evropian që paguan këtë mision.

KTV-ja ka raportuar se si gjyqtarë të EULEX-it janë përfshirë në marrjen e vendime të jashtëligjshme. Njëri prej tyre, Manuel Soares, ka marrë shumë vendime mes periudhës prill – nëntor 2014, kohë kur nuk ishte i dekretuar si gjyqtar në Gjykatën e Apelit.

Kjo ka ndodhur pas 15 qershorit të 2014-ës, kohë kur edhe gjyqtarët e EULEX-it propozohen nga misioni, por emërimin dhe dekretimin e bëjnë KGJK-ja dhe Presidentja, njësojë si për vendësit.