Shefi i Grupit Parlamentar të Lidhjes Demokratike të Kosovës, Arben Gashi, ka bërë të ditur se partia e tij mbështet kërkesën e Qeverisë që sot të mbahet seancë e jashtëzakonshme në Parlament, për lejimin e angazhimit të Ushtrisë së Kosovës në Misione Paqeruajtëse.

Përmes një postimi në rrjetin social Facebook, Gashi ka thënë se secili ushtar i Kosovës do ta nderojë atdheun dhe flamurin tonë dhe Kosovës do t’i kthehet faqebardhë, shkruan Arbresh.info.

Forca e Sigurisë së Kosovës në pranverë të këtij viti pritet t’i bashkohet ushtarëve amerikanë në misione paqeruajtëse.

Ky është postimi i plotë i Arben Gashit:

E nisim vitin me një lajm fantastik!

Grupi Parlamentar i Lidhjes Demokratike të Kosovës e mbështetë kërkesën e Qeverisë që Parlamenti të mbajë, sot, seancë të jashtëzakonshme, për lejimin e angazhimit të Ushtrisë së Kosovës në Misione Paqeruajtëse në kuadër të ushtrive më të fuqishme të botës.

Jemi të bindur se secili ushtar i Kosovës do ta nderojë atdheun dhe flamurin tonë, dhe Kosovës do t’i kthehet faqebardhë!