Ambasada amerikane në Prishtinë njofton se pi pjesë e stërvitjes më të madhe vjetore të Ushtrisë Amerikane, rreth 180 personel nga Divizioni i 28-të i Këmbësorisë së Gardës Kombëtare të Ushtrisë Amerikane të Pensilvanisë do të vendosen në Kosovë për të marrë pjesë në Reagimin e Menjëhershëm 25 së bashku me Forcën e Sigurisë së Kosovës (FSK).

Kjo stërvitje shënon një komponent kritik të përpjekjeve të Ushtrisë Amerikane për të rritur gatishmërinë, për të demonstruar aftësi të shpejta strategjike dhe për të forcuar bashkëpunimin me aleatët dhe partnerët e NATO-s, transmeton Arbresh.info.

“Planifikuar nga 26 maji deri më 9 qershor, Reagimi i Menjëhershëm 25 është një nga tre ngjarjet kryesore të trajnimit të DEFENDER 25 dhe përfshin më shumë se 12,000 trupa nga SHBA, aleatët dhe vendet partnere. Aktivitetet përfshijnë tetë vende: Kosovë, Shqipëri, Bullgari, Kroaci, Greqi, Mal të Zi, Maqedoninë e Veriut dhe Sllovaki. Në Kosovë, Divizioni i 28-të i Këmbësorisë dhe FSK-ja do të marrin pjesë në Reagimin e Menjëhershëm 25 si shtab divizioni që mbikëqyr një brigadë shumëkombëshe. Ushtarët nga Divizioni i 28-të i Këmbësorisë, së bashku me anëtarët e Gardës Kombëtare të Ushtrisë së Iowa-s dhe FSK-së, do të marrin pjesë gjithashtu në një stërvitje kombëtare në Zonën Stërvitore Babaj Bokes (BBTA) më 3 qershor”, thuhet në reagimin e Ambasadës.

Ky angazhim mbështet planin gjithëpërfshirës të tranzicionit të FSK-së, duke avancuar evolucionin e tij në një forcë mbrojtëse territoriale multietnike, të ndërveprueshme me NATO-n, që i nënshtrohet kontrollit civil.

“DEFENDER 25, i udhëhequr nga Ushtria Amerikane në Evropë dhe Afrika, përfshin mbi 25,000 trupa nga 29 vende aleate dhe partnere, duke përdorur 14 porte ajrore të imbarkimit në Shtetet e Bashkuara dhe duke vendosur më shumë se 3,000 pajisje në 18 vende pritëse. Qëllimi kryesor është të demonstrojë aftësinë e Ushtrisë Amerikane për të lëvizur me shpejtësi personelin dhe pajisjet nga SHBA kontinentale në Evropë për operacione luftarake në shkallë të gjerë dhe për të ekzekutuar misione pasuese së bashku me aleatët dhe partnerët”, thuhet më tej në reagim./Arbresh.info