Ministri i Financave, Punës dhe Transfereve Hekuran Murati, dhe Menaxheri i Bankës Botërore për Kosovën dhe Maqedoninë e Veriut, Massimiliano Paolucci, kanë nënshkruar sot Marrëveshjen Financiare për Projektin për “Forcimi i Qeverisjes Dixhitale për Ofrim të Shërbimeve në Kosovë”, i cili synon përmirësimin e cilësisë së shërbimeve administrative publike dhe qasjes së qytetarëve në to.

Mbështetja e aprovuar financiare për projektin pesëvjeçar është kredi koncesionare prej 20 milionë dollarësh, nga Asociacioni Ndërkombëtar për Zhvillim (IDA) i Grupit të Bankës Botërore. Kredia ka maturitet prej 25 vjetësh dhe grejs-periudhë prej 5 vjetësh. Projekti do të zbatohet nga Agjencia për Shoqërinë e Informacionit.

“Projekti për Qeverisje Dixhitale me Bankën Botërore synon dixhitalizimin e shërbimeve nga administrata publike, e rrjedhimisht edhe ngritjen e cilësisë së shërbimeve publike për qytetarët. Tutje, ky projekt do të ndikoj në uljen e kostove financiare e barrës administrative për qytetarët, si dhe rritjen e efikasitetit e transparencës për institucionet publike,” tha Ministri Murati, thuhet në komunikatën për media nga kjo Ministri.

“Zhvillimi i arkitekturës institucionale të qeverisjes digjitale dhe forcimi i infrastrukturës së rrjetit qeveritar dhe platformave të përbashkëta janë themelet kyçe për të mbështetur transformimin dixhital të shërbimeve qeveritare dhe publike,” tha z. Paolucci. “Dixhitalizimi i suksesshëm i shërbimeve dhe nxitja e përdorimit të tyre do t’i përforcojnë përpjekjet e Kosovës për luftimin e korrupsionit, për përmirësimin e fuqizimit të grave, si dhe për luftimin e ndryshimeve klimatike”.

Projekti i propozuar synon të mbështesë përpjekjet e Qeverisë për të hedhur themele solide për sa i përket infrastrukturës, institucioneve dhe shkathtësive dixhitale si prioritete që mundësojnë kushtet e nevojshme për ofrim të shërbimeve me qytetarin në qendër.

Projekti do të mbështesë përmirësimet në ndërveprimin e sistemeve qeveritare, zgjidhjeve për rimëkëmbje nga ndonjë fatkeqësi, si dhe të platformave të përbashkëta.

Ky projekt do të mbështesë zgjerimin e shërbimeve elektronike të qeverisë përmes përmirësimit të portalit e-Kosova dhe pilotimit të një qasjeje inovative për ofrimin proaktiv të shërbimeve me qytetarin në qendër./Arbresh.info/