“Thuaj jo krimeve në rrugë”

15:16 | 15 Nëntor 2015
M. A.

Të brengosur nga rastet e shumta me aksidente në komunikacion, një grup qytetarësh marshoi sot nga sheshi “Zahir Pajaziti” deri tek ai “Skënderbeu” në Prishtinë. Qëllimi i tyre ishte të përcjellin mesazh vetëdijesues tek qytetarët dhe institucionet, për kujdesin në komunikacion.

Të dëshpëruar nga numri i madh i viktimave të trafikut rrugor këtë vit, ata thanë se institucionet duhet të punojnë më shumë dhe qytetarët duhet të jenë më të kujdesshëm në rrugë.

Muhamet Krasniqi, i cili foli në emër të qytetarëve, tha se të gjithë, përshirë institucionet dhe qytetarët, duhet të punojnë për sigurinë në rrugë.

“Thuaj jo krimeve në rrugë” ishte pankarta që e mbanin qytetarët në duar teksa marshonin në qendër të Prishtinës. Atyre iu bashkuan edhe një grup çiklistësh.

Edhe organizata “Nisma Vetëdijesuese për çiklizëm” e shënoi ditën për përkujtimin e viktimave të aksidenteve në rrugë.