Tetë burrat e Ekipit negociator të Kosovës, kanë mbajtur takimin e parë konsultues me përfaqësuesen e Lartë të BE-së, Federica Mogherini, në Bruksel.

Bashkëdrejtuesit e këtij delegacioni, Fatmir Limaj e Shpend Ahmeti, dhe anëtarët e tjerë, paraqitën para Mogherinit rezolutën dhe ligjin për dialogun, raporton KTV.

E, meqë Serbia thotë se nuk do të hyjë në dialog pa anulimin e taksës për mallrat serbe, Fatmir Limaj, tha se për t’u hequr taksa, ka kushte.

Gatishmëria e delegacionit shtetëror për dialog, nuk duhet të keqkuptohet me gatishmëri për të diskutuar gjëra që nuk ia vlejnë, tha Ahmeti.

Limaj e Ahmeti thanë se duhet të kuptohet epilogu i dialogut, duke bërë të ditur se kanë kërkuar angazhim shtesë nga BE-ja, për liberalizim të vizave për kosovarët.

Ata bënë thirrje që Serbia ta ndalë fushatën e tërheqjeve të njohjeve të shtetësisë së Kosovës.

Ahmeti pranoi pas takimit në Bruksel, se ka pasur bisedime ndërmjet SHBA-së dhe Rusisë, lidhur me arritjen e një marrëveshjeje për Kosovën.