Me konstituimin e legjislaturës së shtatë të Kuvendit të Kosovës gjithçka kalon në dorë e Presidentit.

Tashmë Hashim Thaçi duhet të emërojë mandatarin për kryeministër, shkruan portali arbresh.info.

Lëvizja Vetëvendosje, konkretisht Albin Kurti si i nominuar pritet të japë propozimin e tij për kabinetin qeveritar.

Por kjo gjë pritet të mos jetë lehtë, kjo pasi që VV nuk arriti të formojë një koalicion qeverisës me LDK-në.

Pas konsultimit me partitë politike apo koalicionet që kanë shumicën e nevojshme për të formuar një qeveri, Presidenti i Kosovës propozon një mandat prej 15 ditësh për të propozuar kabinetin.

LEXO EDHE: Glauk Konjufca zgjedhet kryetar i Kuvendit të Republikës së Kosovës

Por nëse mandatari i parë nuk arrin të fitojë shumicën në Kuvendin e Kosovës, atëherë presidenti cakton një kandidat tjetër brenda 10 ditëve, sipas procedurës së njëjtë.

Në qoftë se edhe përpjekja  e dytë nuk është e suksesshme në këtë rast shpallen zgjedhje të reja.

Lëvizja Vetëvendosje ka dalë e para në zgjedhjet e 6 tetorit me kandidatin e saj për kryeministër Albin Kurti.

Në bazë të rezultateve të certifikuara nga KQZ për subjektet politike, Vetëvendosje ka 29 ulëse, LDK ka 28 ulëse, PDK ka 24 ulëse, koalicioni AAK-PSD ka 13 ulëse, Lista Serbe ka 10 ulëse, koalicioni NISMA-AKR-PD ka 6 ulëse./arbresh.info/