Ministri i Punëve të Brendshme, Xhelal Sveçla, priti sot në takim delegacionin e Komiteti i Këshillit të Evropës për Parandalimin e Torturës (CPT), të udhëhequr nga Victor Zaharia.

Gjatë takimit, Zaharia, në emër të delegacionit, paraqiti shkurtimisht raportin e hartuar pas vizitave të realizuara në institucionet vartëse të Ministrisë së Punëve të Brendshme, me qëllim të verifikimit të respektimit të të drejtave të njeriut në fushat përkatëse.

Ministri Sveçla e njoftoi delegacionin mbi angazhimet e institucioneve për zbatimin e rekomandimeve nga raporti paraprak, duke theksuar se do të ketë përkushtim të plotë edhe në adresimin e gjetjeve të reja.

“Do të ketë angazhim maksimal në trajtimin e gjetjeve të evidentuara në kuadër të kësaj vizite, të cilat pritet të publikohen në raportin që do të bëhet publik gjatë muajit korrik të këtij viti”, theksoi Sveçla.

Në emër të Ministrisë së Punëve të Brendshme, ai falënderoi delegacionin e CPT-së për bashkëpunimin e vazhdueshëm me institucionet e Kosovës në ngritjen dhe avancimin e kapaciteteve, me qëllim të respektimit të plotë të të drejtave të njeriut.