Shërbimi Spitalor dhe Klinik Universitar i Kosovës (ShSKUK) ka reaguar ndaj shqetësimeve të ngritura në opinion për mungesën e barnave që parandalojnë gjakderdhjen tek pacientet që marrin shërbime obstetrike.

Sipas institucionit, pacientet nuk kanë arsye për panik, pasi trajtimi i nevojshëm po ofrohet pa ndërprerje, shkruan Arbresh.info

“Asnjë paciente e hospitalizuar nuk detyrohet të blejë barin që parandalon gjakderdhjen”, thuhet në komunikatën zyrtare të SHSKUK-së, duke sqaruar se në mungesë të metilergometrinës, përdoret alternativa mjekësore oksitocina, e cila ka efekt të njëjtë.

“Oksitocina mbulon nevojat terapeutike sipas standardeve mjekësore dhe e posedojmë në sasi të mjaftueshme”, thekson SHSKUK.

Në njoftim thuhet gjithashtu se, ndonëse është hapur procedurë e rregullt e prokurimit për furnizim me metilergometrinë, “nuk ka pasur ofertues”, gjë që ka pamundësuar sigurimin e këtij produkti në mënyrë të drejtpërdrejtë.

“Rikujtojmë se oksitocina që përdoret në ShSKUK mbulon plotësisht trajtimin mjekësor në rastet e gjakderdhjeve, dhe nuk ka nevojë për shqetësim apo panik tek pacientet”, thuhet në fund të reagimit./Arbresh.info