Vendimi i Kushtetueses për njohjen e pronësisë së manastirit të Deçanit mbi pronat e ndërmarrjeve publike “APIKO” dhe “ILIRIA”, sipas Shoqatës së Intelektualëve të Pavarur në Deçan, është vendim politik dhe i dëmshëm për qytetaret e Deçanit, ngase pengon zhvillimin ekonomik të kësaj komune dhe nxit urrejtjen ndërnacionale dhe ndërfetare.

“Ne, jemi kundër çdo vendimi politik që është në kundërshtim me interesat e qytetarëve, kundër zhvillimit të komunës sonë”, thuhet në një reagim të kësaj shoqate.

Sipas shoqatës, përgjegjësia për vendimet e këtilla politike bie mbi institucionet e vendit, qofshin komunale dhe qendrore, e mbi gjitha mbi kryetaren e Gjykatës Kushtetuese, Arta Rama-Hajrizi dhe anëtarëve tjerë që ishin në përkrahje të këtij vendimi.

“Reagimi aq i shpejt i Hashim Thaçit, në përkrahje të Kushtetueses, tregon pafytyrësinë e tij dhe fakti më i mirë se interesi i tij politik është mbi interesat kombëtare dhe qytetare”, thuhet në fund.