Është arrestuar ngasësi i veturës BMW ngjyrë e gjelbër neon, që ditëve të fundit është bërë viral kudo në rrjetet sociale.

R.H., 34 vjecar dëgjonte muzikë me zë të lartë, që dukej se u pengonte banorëve të lagjeve të kryeqytetit.

Lajmin për arrestimin e tij e ka konfirmuar për Arbresh.info Zëdhënësja e Policisë së Kosovës për Rajonin e Prishtinës, Flora Ahmeti.

Ahmeti tha se personit në fjalë i figurojnë 225 gjoba të regjistruara.

Të njejtit i është konfiskuar përkohësisht automjeti.

“Në rrjetet sociale gjatë ditës së djeshme, ka qarkulluar një video-incizim në të cilën vërehet, se si në magjistralen Prishtinë -Podujevë , në kryqëzimin në fshatin Leban, ngasësi i automjetit të tipit BMË ngjyrë e gjelbër, bënë lëvizje të rrezikshme me automjetin në fjalë dhe rrezikon seriozisht pjesmarrësit tjerë në trafik. Ngasësi i automjetit R.H, mashkull, 34 vjeç, është identifikuar sot nga ana e policisë dhe i njëjti është shoqruar në Stacionin Policor Veriu Prishtinë. Pas verifikimit në të dhënat e policisë, ka rezultuar se personit në fjalë i figurojnë 225 gjoba. Personi i dyshuar pas intervistimit dhe përfundimit të procedurave të nevojshme policore , me vendim të prokurorit të shtetit është dërguar në mbajtje për veprën “ Shkaktim i rrezikut të përgjithshëm” si dhe është sekuestruar përkohsisht automjeti”, ka thënë Ahmeti.