Deklaratat e fundit të presidentit të Serbisë, Aleksandar Vuciq se asnjë polic shqiptar nuk duhet të shkel në pjesën veriore të Kosovës, kandidatit për deputet nga Nisma, Bilall Sherifi po i quan raciste.

Përmes një postimi në Facebook, ai thoit se përmes këtyre deklaratave rikonfirmohet se Vuçiq nuk ka ndryshuar dhe se do mbes racist.

Ja postimi i tij:

Deklarata e fundit e Aleksandar Vuçiq, Presidentit të Serbisë, përmes të cilës pretendon që asnjë polic shqiptar të mos shkel në pjesën veriore të Kosovës, nxori në shesh racizmin e tij të kulluar.

Kjo deklaratë e tij rikonfirmon se Aleksandër Vuçiqi dhe përmes tij politika zyrtare e Serbisë, jo vetëm nuk ka ndryshuar, por ka qenë dhe mbetet raciste. Vuçiqit nuk i pengon polici serb i Kosovës, atij i pengon polici shqiptar i Kosovës.

Pra, atij i pengon përkatësia kombëtare e policit. Kjo është racizëm, asgjë më pak!

Populli shqiptar i Kosovës dhe të gjithë ata që i kanë ndjekur zhvillimet politike në Kosovë nuk presin asgjë pozitive nga ish ministri i Informatave të Millosheviqit i periudhës kur shteti serb kreu gjenocidin në Kosovë. Përkundrazi! Ndërrimi i kostumit ministror, nga një person që ishte i angazhuar në fshehjet e gjurmëve të krimit të gjenocidit, me kostum “demokrati” na imponon një angazhim më serioz në zhveshjen e tërësishme të maskës së tij raciste. Qeveria e ardhshme e ka për detyrë të ndërtojë një politikë të re që kësaj politike të Serbisë t’i përgjigjemi institucionalisht ashtu siç e meriton.

Kam bindjen e fortë se qasja jonë e re do ta shpartallojë politikën e Serbisë ndaj Kosovës. Racizmit i ka ardhur fundi, së paku në Evropë!