Deputeti i Nismës, Haxhi Shala, thotë se opozita aktuale s’është e koordinuar mjaftueshëm që ta rrëzojë qeverinë Haradinaj, edhe pse koalicioni qeverisës ka numër minimal të deputetëve.

“S’kemi opozitë të organizuar që të na rrëzojë. Numrat i kanë të mëdhenj. Do Zoti që të organizohen mirë e ta mbikëqyrin këtë qeveri. Edhe ne kemi numra mjaft, por nuk po mund ta kalojmë demarkacionin. Nuk po mund të koordinohen. Kemi qenë më pak në legjislaturën e shkuar, por kemi arritur të koordinohemi. LDK, VV dhe një grup tjetër parlamentar nuk mund të bëhen bashkë. LDK s’e harron çfarë i ka bërë VV-ja në të kaluarën liderit të saj”, ka thënë Shala në Interaktiv të KTV-së.

Ai ka thënë se kjo qeveri ka më shumë shanse që të bijë nga mospuna dhe që njëri partner të kërkojë rrëzimin sesa që mund të rrëzohet nga partitë opozitare.

“PDK-ja deri tash i rrëzoi tri qeveri, por tash besoj se mbetet pa partner nëse na bën siç ka bërë me të tjerat. Më parë e rrëzojmë veten se kjo opozitë”, është shprehur ai./koha.net/