UD i ministrit në detyrë i Drejtësisë, Blerim Sallahu, sot ka pritur në takim ambasadorin e Turqisë në Kosovë, Sabri Tunç Angılı. Në takim ishte edhe sekretarja e parë Aylin Senyuz, njëkohësisht përgjegjëse për çështje konsullore, asistentja Ajsel Polak dhe zyrtarja nga ministria e Drejtësisë, Anesa Sllovinja.

Sipas njoftimit nga Ministria e Drejtësisë, Sallahu dhe ambasadori Angılı diskutuan për çështjet e bashkëpunimit juridik ndërkombëtar mes Kosovës dhe Turqisë dhe shkëmbimin e praktikave më të mira në fushën e drejtësisë.

“Të dy palët u shprehën të gatshme për avancimin e iniciativave të përbashkëta që kontribuojnë në sundimin e ligjit”, thuhet në njoftim.

Bëhet e ditur se Sallahu e njoftoi ambasadorin Angılı edhe për reformën në drejtësi, avancimin e infrastrukturës ligjore dhe rritjen e transparencës institucionale. Ai theksoi se këto reforma janë thelbësore për forcimin e shtetit të së drejtës dhe përmbushjen e standardeve ndërkombëtare.

Në fund të takimit, Sallahu shprehu mirënjohjen për mbështetjen e vazhdueshme të Turqisë dhe rëndësinë e këtij partneriteti për të ardhmen e përbashkët të të dy vendeve./Arbresh.info