Kryeministri i Kosovës, Albin Kurti ka bërë të ditur mbledhja e dytë e Qeverisë për këtë javë, e 224-ta me radhë, e mbajtur të premten në mënyrë elektronike solli mes tjerash vendimin për rritjen e pensioneve me 20 për qind.

Kurti në një postim në ‘Facebook’ ka shkruar se rritja e pensioneve fillon nga ky muaj.

“Mbledhja e dytë e Qeverisë për këtë javë, e 224-ta me radhë, e mbajtur dje në mënyrë elektronike, solli mes tjerash këto vendime të rëndësishme: Rritjen e pensioneve me 20 për qind duke filluar nga ky muaj, për skemat dhe nën-programet: Pensioni bazik i moshës; Pensionet kontributdhënëse I, II, III dhe IV”, ka shkruar ai.

Po ashtu ai ka shkruar se rriten edhe pensionet për aftësitë e kufizuara duke përfshirë atë për fëmijë dhe të rritur si dhe për personat e verbër I dhe II e për personat paraplegjik dhe tetraplegjik I dhe II; Pensioni familjar; Pensioni invalidor i punës dhe Pensioni i parakohshëm për Trepçën.

Në këtë mbledhej qeveria ka bërë ndarjen e 200 mijë eurove për Olimpiadën Evropiane të Vajzave në Matematikë (EGMO) 2025, të organizuar nga Shoqata e Matematikanëve të Kosovës dhe ndarjen e 200 mijë eurove për ofrimin e ndihmës për rimëkëmbje nga fatkeqësia natyrore dhe vërshimet e ndodhura në Bosnje dhe Hercegovinë.