Sekretari organizativ i AKR-së, Rrahim Pacolli ka përshëndetur arrestimin e drejtorit të të ashtuquajturës Zyra për Kosovën, Marko Gjuriq.

Pacolli ka thënë se si parti dhe pjesë e qeverisë Haradinaj e mbështesin në tërësi veprimin e institucioneve në sundimin e ligjit.

Nga të përfshirët në aksionin e sotëm z. Pacolli në veçanti ka përgëzuar njësinë speciale ROSU për profesionalizmin e treguar sot.

Lexojeni të plotë shkrimin e Rrahim Pacollit në Facebook:

Si parti politike dhe pjesë e Qeverisë Haradinaj në tërësi e përkrahim dhe mbështesim veprimin e institucioneve të Kosovës në sundimin e ligjit.

E përgëzojmë Ministrinë e Punëve të Brendshme, drejtorin e Policisë së Kosovës, posaçërisht e përgëzojmë për profesionalizmin e treguar Njësitin Special ROSU dhe të gjitha njësitet tjera të cilat kanë vepruar sot në veri, të cilët dëshmuan dhe kontribuuan në sundimin e ligjit të Kosovës.

Kosova është shtet i pavarur, dhe si shtet i pavarur respekton dhe tregon respekt për të gjitha vendet, njëkohësisht pret respektim të ligjit dhe institucioneve të vendit nga vendet fqinje.

I tërë veprimi i sotshëm i policisë ka qenë në përputhje me ligjet në fuqi të Republikës së Kosovës. RrP