Me 16, 17 dhe 18 gusht në Rahovec do të mbahet festivali i rrushit dhe rakisë që njihet si “Hardh Fest”.

“Një gotë për mot” do të jetë sllogani i këtij festivali ku për tri ditë rresht do të sjell aktivitete të ndryshme që ndërlidhen me vjeljen e rrushit dhe produktet nga rrushi.

Drejtor artistik i Hardh Festit, Gardalin Shtalica  tregoi në një konferencë për media se i ftuar special i festivalit do të jetë Ronnie Romero me përcjellje të grupit Eridan.

“Ronnie Romero do të jetë i ftuari special i këtij festivali që  do të jetë nën përcjelljen e grupit Eridan”, ka thënë ai.

Pjesëmarrës të tjerë do të jenë 3 Musketnerët, 4×4, Rahoveci all Stars, Jehonë, Amer Doux, dj Fisnik Kuqi etj.

Festivali i vjeljes së rrushit që po njihet edhe si Hardh Fest do të mbledh shumë turistë nga vendet e rajonit thanë organizatorët e festivalit.

Ata treguan se këtë vit risi e Hardh Festit është hapja me prerjen zyrtare të kalaveshit të rrushit, vjeljen e rrushit dhe promovimet të verës dhe rakisë.

Ky festival është përkrahur edhe nga komuna e Rahovecit duke  ndarë një buxhet prej 15 mijë euro për organizim./arbresh.info/