Profesori universitar, Riza Smaka thotë se është koha që presidentin ta zgjedhë populli.

Por, aktualisht sistemi zgjedhor në Kosovë nuk e mundëson një gjë të tillë.

Sipas Smakës, meqë kjo është e pamundshme, partitë politike nuk duhet të imponojnë emra për postin e presidentit.

“Do të ishte zgjidhja më e mirë e mundshme që jo vetëm PDK-ja po asnjë parti mos të imponojë emrin e Presidentit. Do të duhej që kandidati apo kandidatja të jetë me integritet, dhe i/e duhur”, është shprehur Smaka për arbresh.info.

Edhe Smaka vë në pah rolin dhe ndikimin e PDK-së në këtë moment ani pse në krye të saj nuk gjendet kryetari, Kadri Veseli.

“PDK është pashmangshëm subjekt me influencë dhe që votat e tyre janë relevante për të vendos për tri çështjet si për President, si për zgjedhje si për qëndrimin e Qeverisë. Zgjedhja më e mirë do të ishte që Presidentin ta përzgjedhte populli. Tash për tash zgjidhja është e mbyllur që praktikisht e mundëson zgjedhjen nga koalicioni që ka vota”./arbresh.info/