Organizatat e dala nga lufta e UÇK-së kanë reaguar pas vendimit të asamblistëve të veriut të Mitrovicës, për vendosjen e shtatores së Car Lazarit në këtë komunë. Kryetari i Shoqatës së Familjeve të Dëshmorëve, Xhavit Jashari në një prononcim për “Indeksonline” ka thënë se vendosja e një shtatoreje të tillë është provokim i rënd për vendin.

Sipas tij, veprimet e Serbisë ndaj Kosovës janë nxitëse dhe mund të çojnë deri në destabilizim në gjithë territorin e Republikës. Jashari tërhoqi edhe një paralele ndërmjet dy shteteve, duke përmendur rastin e largimit me dhunë të pllakës përkujtimore për dëshmorëve të UÇPMB-së në Preshevë. Pllaka e dëshmorëve u pat hequr me dhunë nga qindra pjesëtarë të Njësisë Speciale të policisë serbe.

“Institucionet duhet të reagojnë dhe jo ta neglizhojnë këtë çështje. Duhet të kushtëzohen gjëra me Kosovën lindore, me luginën e Preshevës, kur dihet fakti se si është reaguar ndaj lapidarit të pjesëtarëve të UÇPMB-së. Mendoj se pa pëlqimin dhe pa miratimin e institucioneve vendore, nuk duhet të vendosin asnjë shenjë në territorin e Republikës së Kosovës, pasi që mbrohet edhe me Kushtetutë”, ka thënë ai.

Megjithatë, Jashari e ka konsideruar të pafuqishme ndërhyrjen e Qeverisë Mustafa në tërë territorin e vendit. Ai poashtu thotë se ndërkombëtarët duhet t’i ndërpresin disa praktika, të cilat i shkojnë në favor politikës serbe.

“Pra, kjo është edhe një tregues që Qeveria e Republikës së Kosovës nuk është e denjë për të mbrojtur dhe për të qenë e pranishme në tërë territorin e vendit. Mendoj se vendosja e një shtatore të tillë në veriun e Mitrovicës është një provokim i rëndë. Faktori ndërkombëtar, i instaluar në Kosovë, duhet t’i ndërpresë praktika të tilla të cilat po ndodhin nga Serbia, në territorin që nuk është i saj. Ne e kundërshtojmë fuqishëm këtë veprim të vendosjes të një shtatore dhe e konsiderojmë një provokim të rëndë dhe nxitës për destabilizimi në territorin e Republikës së Kosovës”, është shprehur ai.