Pjesëtarët e Ministrisë së Punëve të Brendshme të Serbisë kanë arrestuar një shtetas të Kosovës në Medvegjë.

Sipas mediave serbe, i arrestuari është E.O., i lindur në vitin 1999 dhe është nga Prishtinës, raporton ‘rominfomedia’.

Ai është kapur gjatë një operacioni të MPB-së serbe, i cili kishte për qëllim parandalimin e prerjeve të paligjshme të pyjeve në komunën e Medvegjës.

Ai dyshohet se ka prerë rreth 30 metra kub dru ahu në Zonën e Sigurisë Tokësore, së bashku me tre persona të tjerë që arritën të ikin përmes kufirit. Policia ka gjetur dy traktorë dhe dy sharrë elektrike me motor në vendin e ngjarjes,’ thuhet në njoftimin e policisë.

Pas arrestimit, i dyshuari është dërguar në prokurorinë kompetente në Lebanë, Serbi, dhe pas procedurës, Gjykata Themelore ka caktuar masën e paraburgimit prej 30 ditësh.