Kryetari i Komunës së Deçanit Bashkim Ramosaj thotë se kryeministri Avdullah Hoti ka kërkuar që të pezullohen punimet në rrugën Deçan – Plavë pas reagimeve të shumta të ndërkombëtarëve.

“Kam këmbëngulë që brenda disa ditëve të bëhet zgjidhja e fundit në mënyrë që të hënën të vazhdohet me punimet ashtu siç kemi vazhduar’, tha Hoti duke treguar bisedën e fundit që ka zhvilluar me kryeministrin Avdullah Hoti.

“Komunikimi i fundit ka qenë ditën e shtunë. Komunikimin e parë për këtë temë e kemi pasur në orën 05:00 pasdite të premten kur ka kërkuar pezullimin e punëve”, shpjegoi ai për RTV Dukagjini.

Ramosaj tha se është munduar që t’u shpjegojë ambasadorëve të huaj në vend se asfaltimi i kësaj rruge do të sjellë vetëm të mira për qytetarët e kësaj komune.

“Jam mundur që para Hotit dhe ambasadorëve të tjerë të tregojë konceptin zhvillimor që kishte me sjell standard ekonomik për qytetarët e kësaj komune në sektorin e turizmit’, tha Ramosaj.

Fillimi i punimeve të rrugës Deçan-Plavë (R-108), rrugë kjo që e lidh rajonin e Dukagjinit me atë të Plavës dhe Gucisë, ka filluar në 2018.

Gjykata Kushtetuese e Kosovës më 2016 kishte marrë vendim sipas të cilit i njihet e drejta e pronësisë Manastirit të Deçanit mbi 24 hektarë tokë. Por, ky vendim nuk është zbatuar asnjëherë nga ana e kësaj komune.

Zyrtarë të institucioneve ndërkombëtare në Kosovë, në vazhdimësi kanë bërë thirrje që të respektohet vendimi i Gjykatës Kushtetuese.