Zëvendësministri i Forcës së Sigurisë së Kosovës, Burim Ramadani në një intervistë për portalin Arbresh.info ka treguar se deri në çfarë faze ka arritur draft-ligji për FSK-në.

Ai ka thënë se ndryshimi i FSK-së do të bëhet me ndryshime Kushtetuese.

“Në aspektin normativ gjithçka është e përgatitur kurse në aspektin e koordinimit kjo është në të cilën Qeveria e Kosovës është duke u angazhuar me partnerët ndërkombëtar dhe me përfaqësuesit politik. Ne kemi qëllimin kryesor që të ndodh përmes ndryshimeve kushtyetuese por po ashtu jemi të gatshëm që të fillojmë tranzicionin e FSK-së, duke synuar që në ndërkohë të ndodhë ndryshimet Kushtetuese”, ka thënë ai.

Ramadani ka thënë se ligji është i gatshëm mirëpo sipas tij problemi është tek vendimmarrja politike.

“Me këtë ligj ndryshohet misioni, ndryshohet struktura, këto janë çështje të përgatitura edhe më parë, problemi është pastër i vendimmarrjes politike por, unë jam optimist se kjo vendimmarrje është afër duke qenë të bindur se përpjekjet e deritashme janë përmbushur në formë të plotë dhe përpjekjet e vazhdueshme do të ndodhin edhe në të ardhmen”, ka shtuar ai. /V.Berisha/Arbresh.info