Qendra Kosovare për Studime të Sigurisë ka publikuar rezultatet preliminare të edicionit të pestë të sondazhit “Barometri kosovar i sigurisë”.

Këtë vit janë përmbledhur rezultatet e perceptimeve të respodentëve lidhur me besueshmërinë, nivelin e korrupsionit në institucionet e drejtësisë dhe sigurisë, të ardhmen e institucioneve të sigurisë, si dhe perceptimet lidhur me kërcënimet dhe rreziqet e jashtme dhe te brendshme.

Drejtori ekzekutiv i kësaj qendre, Florin Qehaja, ka thënë se programi “Barometri kosovar i sigurisë” ka për qëllim të bëjë matjen e perceptimit të qytetarëve lidhur me institucionet e sigurisë, siç janë policia, FSK-ja, Agjencia e Inteligjencës, zjarrfikësit, EULEX-i, KFOR-i, pastaj institucionet e drejtësisë, siç janë gjykatat, prokuroritë si dhe perceptimet ndaj vendeve fqinje dhe superfuqive botërore.

Sipas këtij hulumtimi institucionet e sigurisë rezultojnë të jenë më të besueshme, duke prirë FSK-ja pastaj KFOR-i me 67%, PK 55 %, IPK me 43% dhe 13% i besojnë AKi-së.

Besueshmëria e respodentëve ndaj institucioneve të drejtësisë sipas raportit të publikuar është tejet e ulët. Respektivisht, rreth 57% e tyre theksuan se nuk i besojnë EULEX-it, 51% Gjykatave dh Prokurorisë 41%.

Sa i përket perceptimit të qytetarëve për nivelin e korrupsionit në institucione të sigurisë dhe drejtësisë, rezultatet treguan se qytetarët i  shohin institucionet e sigurisë më pak të korruptuara. Ndërsa ato më të korruptuara janë Qeveria e Kosovës dhe Gjykatat, thuhet në raport.

Sa i përket rreziqeve dhe kërcënimeve të brendshme kryesore që e rëndojnë sigurinë kombëtare të Kosovës, qytetarët kanë vlerësuar se katër janë më shqetësueset: Papunësia (97%), Korrupsioni (95%), Krimi i Organizuar (92%) si dhe Mungesa e Stabilitetit Politik me 90%.

Ndërsa sa i përket rreziqeve dhe kërcënimeve nga jashtë, Shteti Islamik (ISIS) me 76 % shihet si rreziku kryesor pastaj Serbia vazhdon të jetë si sfidë e jashtme për siguri me 66%, pastaj Ekonomia Globale, konfliktet e Lindjes së Mesme.

Perceptimet mbi mungesën e stabilitetit politik janë të ndikuara nga ngërçi aktual dhe zhvillimet e fundit në Kuvendin e Kosovës të nxitura nga mosmarrëveshjet e thella ndërmjet partive në pushtet dhe opozitës. Izolimi është konsideruar rrezik për 77% të respodentëve duke iu referuar që ngritja e refuzimit të vizave është vetëm duke kontribuar në ngritjen e migrimit dhe azilkërkimit.

Mes tjerash, rezultatet e BKS 2015 po ashtu tregojnë se rreth 88% e respodentëve janë në favor të transformimit të FSK-së në Forcën e Armatosur të Kosovës (FAK), që njëkohësisht mund të thuhet së ky transformim përbën politikën institucionale më të përkrahur nga qytetarët e cila megjithatë siç duket është neglizhuar kohëve të fundit nga ana e institucioneve.

Sa i përket KFOR-it, shumica e respodentëve ishin të mendimit se ky mision duhet të vazhdoj të qëndroj në Kosovë edhe për 3 deri 5 vitet e ardhshme, duke e ndërlidhur me bartjen e kompetencave të këtij misioni tek Forca e Armatosur e Kosovës./Arbresh.info