Shërbimi Spitalor Klinik Universitar (ShSKUK) ka njoftuar se është ritur numri i operacioneve të karcinomës së gjirit, në kuadër të Klinikës së Kirurgjisë Torakale, të Qendrës Klinike Universitare të Kosovës (QKUK).

Sipas statistikave, vetëm këtë vit deri më tani janë kryer 172 operacione të karcinomës së gjirit, kurse tërë vitin 2022, ishin kryer 149 raste, shkruan Arbresh.info.

ShSKUK bën të ditur se pacientët nuk kanë nevojë të shkojnë për trajtim jashtë vendit për operacion.

“Pacientet që kanë nevojë për operacion pas karcinomës së gjirit, nuk kanë nevojë të shkojnë për trajtim jashtë vendit, ngase klinika ka numër të mjaftueshëm dhe profesional të mjekëve dhe stafit që kryejnë të gjitha llojet e operacioneve të gjirit.”, thuhet në njoftim.

Po ashtu në njoftim thuhet se për operacion të tilllë, nuk ka listë të pritjes dhe të gjitha gratë që kanë nevojë për operacion trajtohen me prioritet nga mjekët e klinikës.

“Për operacion, pas karcinomës së gjirit, nuk ka listë të pritjes dhe të gjitha gratë që kanë nevojë për operacion trajtohen me prioritet nga mjekët e klinikës”, njofton ShSKUK./Arbresh.info/