Kryetari i Gjykatës Kushtetuese, Nexhmi Rexhepi, priti në takim ambasadoren e Mbretërisë së Holandës në Kosovë, Karin Boven.

Sipas njoftimit të kësaj gjykate, Rexhepi e njoftoi ambasadoren Boven me rolin dhe funksionin e Gjykatës, për punën e deritanishme të saj, si dhe për zbatimin e praktikës gjyqësore të Gjykatës Evropiane për të Drejtat e Njeriut në vendimmarrje.

Ai shprehu falënderimin e tij për ndihmën e vazhdueshme që Qeveria holandeze i ka ofruar Republikës së Kosovës në sektor të ndryshëm, e veçanërisht në sundimin e ligjit dhe zhvillimin demokratik, duke vënë theksin edhe në marrëdhëniet shumë të mira të bashkëpunimit me Gjykatën Supreme të Holandës.

Ambasadorja Boven konfirmoi nga ana e saj vazhdimin e mbështetjes së Qeverisë holandeze për institucionet e Republikës së Kosovës në forcimin e sundimit të ligjit në vend dhe shprehu gatishmërinë që të mbështesë Gjykatën Kushtetuese në avancimin e mëtejmë të kapaciteteve të saj profesionale me trajnime të specializuara./Arbresh.info/