Protestoi ndaj Fitore Pacollit, qytetari lirohet pas intervistimit nga Policia – ndaj tij niset hetim për kanosje

20:04 | 25 Korrik 2025
Q L

Policia e Kosovës ka bërë të ditur se qytetari Agim Pllashniku është liruar pas intervistimit në stacionin policor, në lidhje me protestën ndaj deputetes së Lëvizjes Vetëvendosje, Fitore Pacolli.

Zëdhënësi i Policisë për rajonin e Prishtinës, Agron Borovci, konfirmoi se ndaj Pllashnikut është iniciuar hetim për veprën penale “Kanosje”.

“Referuar këtij rasti, i dyshuari është ftuar për intervistim nga ana e policisë dhe me rekomandimin e prokurorit të shtetit, ndaj tij është iniciuar një hetim në drejtim të veprës penale ‘Kanosja’, dhe i njëjti më pas është proceduar i lirë”, deklaroi Borovci.

Rasti ndodhi sot, kur Pllashniku protestoi në mënyrë simbolike ndaj deputetes Pacolli në një lokal, duke i dorëzuar një kupon fiskal dhe duke e quajtur atë “hajdute”.

Hetimet për rastin janë duke vazhduar në koordinim me Prokurorinë e Shtetit.