Prokuroria Themelore në Prishtinë ende nuk e ka pranuar raportin e autopsisë lidhur me rastin e Agon Zejnullahut.

Këtë e ka bërë të ditur për Arbresh.info zëdhënësja e Prokurorisë Themelore në Prishtinë, Kaltrina Shala.

“Lidhur me pyetjen tuaj ju njoftojme, se Prokuroria Themelore ne Prishtine, nuk ka pranuar raport zyrtar te autopsise nga Mjekesia Ligjore, lidhur me rastin e viktimes A.Z. Per cdo zhvillim te metejme ju njoftojme me kohe”, tha ajo.

Ndryshe, Agon Zejnullahu, 27 vjeç, ka ndërruar jetë në orët e para të së hënës, pak pasi ishte arrestuar nga Policia në Lipjan, nën dyshimet se po sulmonte automjete dhe kalimtarë.

Rasti i vdekjes së tij po hetohet si “vrasje nga pakujdesia”. Pesë zyrtarë policorë, përfshirë një rreshter, janë nën hetim për këtë incident. Të njëjtit janë suspenduar dhe ndaluar për 48 orë me urdhër të Prokurorit të Shtetit.

Brenda afatit ligjor, Prokuroria Themelore në Prishtinë pritet të paraqesë kërkesën për caktimin e masës së sigurisë ndaj të dyshuarve. Ndërkohë, mbetet të konfirmohet nëse vepra penale do të kualifikohet zyrtarisht si “vrasje nga pakujdesia”./Arbresh.info