Prokuroria Themelore në Prishtinë ka reaguar pas të shtënave me armë që ndodhën pasditen e së enjtes në qendër të Podujevës, ku si pasojë mbetën të plagosur tre persona.

Zëdhënësja e Prokurorisë, Kaltrina Shala, bëri të ditur se menjëherë pas pranimit të informatës nga Policia e Kosovës, prokurori kujdestar nga Departamenti për Krime të Rënda ka dalë në vendin e ngjarjes për të udhëhequr veprimet hetimore.

“Lidhur me rastin ju njoftojmë se pas pranimit të informatës nga Policia e Kosovës, prokurori kujdestar nga Departamenti për Krime të Rënda ka dalë menjëherë në vendin e ngjarjes, me qëllim të ndërmarrjes së veprimeve hetimore për zbardhjen e rrethanave të kësaj ngjarjeje. Deri tani këto informata i posedojmë. Për më shumë informacione ju njoftojmë me kohë”, ka deklaruar Shala.

Më herët, Policia e Kosovës njoftoi se rasti është raportuar rreth orës 13:30, ndërsa tre personat e plagosur janë dërguar në Qendrën Klinike Universitare të Kosovës (QKUK) për trajtim mjekësor.

Hetimet janë në zhvillim, ndërsa autoritetet ende nuk kanë bërë të ditur motivet e të shtënave apo identitetin e personave të përfshirë në incident.