Policia e Kosovës ka arrestuar sot inspektorin e punës G. B., i dyshuar se ka kërkuar ryshfet prej 2,000 eurosh për të lejuar zhvillimin e punimeve në një punishte në Prishtinë, ndërsa i dyshuari është dërguar në mbajtje prej 48 orësh për procedura të mëtejshme ligjore.

Njësia Rajonale për Hetimin e Krimeve Ekonomike dhe Korrupsionit në Prishtinë, ka njoftuar se ka arritur të sigurojë informata dhe prova që dëshmojnë se pala ankuese/viktima M. K., pronar i një Kompanie Ndërtimi dhe shtetas i huaj me leje qëndrimi të përkohshme në Republikën e Kosovës, është kushtëzuar nga një punonjës, respektivisht Inspektor i Punës në kuadër të Inspektoratit të Punës, G. B.

Sipas Policisë, inspektori dyshohet se i ka kërkuar 2,000 euro ryshfet viktimës që ta lejoj të punojë, duke kërcënuar se në të kundërtën do t’i ndërpresë punimet që po realizonte me kompaninë e tij.

Policia ka njoftuar se gjatë gjithë kohës hetuesit kanë qenë në konsultë të vazhdueshme me Prokurorin e rastit nga Prokuroria Themelore në Prishtinë dhe si rezultat i veprimeve të ndërmarra, përfshirë sigurimin e dëshmive, sekuestrimin e parave të pranuara si ryshfet, sekuestrimin e telefonit të dyshuarit dhe provave të tjera, është arritur në përfundimin se:

“Si rezultat i veprimeve nga personi i dyshuar, duke kushtëzuar viktimën për të dhënë ryshfet për realizimin e të drejtës së tij/kryerja e punëve në punishte, si dhe pranimi i ryshfetit në shumën prej 1,000.00€ nga i dyshuari/Inspektori i Punës.”

Mbi bazën e këtyre veprimeve, dyshohet se i dyshuari G. B. ka kryer veprat penale:

“Keqpërdorim i pozitës apo autoritetit zyrtar”, nga neni 414 i KPRK-së.

“Marrja e ryshfetit”, nga neni 421 i KPRK-së.

Policia njofton se më datë 28.01.2026, i dyshuari G. B. është intervistuar në cilësi të personit të dyshuar në prezencën e Avokatit mbrojtës dhe pas konsultës me Prokurorin e rastit nga Prokuroria Themelore në Prishtinë, Departamenti i Krimeve të Rënda, i dyshuari është dërguar në mbajtje prej 48 orësh për procedura të tjera ligjore.