Në sallën e gjyqit të Dhomave të Specializuara të Kosovës (DHSK) në Hagë, është duke u mbajtur paraqitja e parë e kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hysni Gucati, si i akuzuar.

Ai, para trupit gjykues është deklaruar se ndjehet i pafajshëm, shkruan arbresh.info.

“Është e drejtë e imja që ne mënyrë ligjshme të mbroj vlerat e kombit shqiptar dhe të Ushtrisë Çlirimtare të Kosovës e do vazhdoj të i mbroj deri në fund. Në të gjitha pikat që mu lexuan deri tash, e ndjej veten të pafajshëm dhe plotësisht i pafajshëm”, ka thënë Gucati.

Gucati e bëri këtë veprim në konsultim me avokatin e tij Jonathan Ellison Reiss.
Gjyqtari i procedurës paraprake, Nicollas Guillou, ka thënë se pushimi për gjyqtarët e Gjykatës Speciale fillon me 21 dhjetor të këtij vitit dhe përfundon në datën 1 janar të 2021.

“Pushimi për gjyqtarët e Gjykatës Speciale fillon me 21 dhjetor të këtij vitit dhe përfundon në datën 1 janar të 2021. Unë gjatë kësaj periudhe do ti përgjigjem vetëm çështjeve urgjente e çështjeve jourgjente i duhet drejtuar gjykatës pas pushimit”, ka thënë gjyqtari i procedurës paraprake, Nicollas Guillou.

Ndërkaq, seanca për deklarim rreth fajësisë apo pafajësisë, e nënkryetarit të OVL-UÇK’së, Nasim Haradinaj, pritet të mbahet më 7 ose 8 janar të vitit 2021./Arbresh.info