​Protesta e opozitës në Shqipëri ka përfunduar. Megjithatë ka pasur tension kur protestuesit kanë goditur me vezë, shkopinj, por dhe tymuese në drejtim të kryeministrisë, ku janë thyer xhamat e dyerve.

Ndërkohë policë të shumtë kanë rrethuar jo vetëm pjesën përpara, por edhe të gjitha anët të kryeministrisë.Opozita kërkon largimin e qeverisë Rama-Meta, dhe krijimin e një qeverie teknike që do të çojë vendin drejt zgjedhjeve të parakohshme.

Kryetari i Partisë Demokratike, Lulzim Basha ka thënë para protestuesve se mosbindja civile ka nisur.

“Nuk do të lodhemi,është fillimi i një stine protestash. Ka nisur mosbindja civile. Në këmbë qytetarë e qytetare. Qeveria teknike është zgjidhja, zgjedhje të reja demokratike”, ka thënë Basha.

Ndërsa kryetari i PD-së mbante fjalën ka pasur tension para kryeministrisë, ku protestuesit tentuar të kalojnë kordonin e policisë. Megjithatë, në këto momente situata është e qetë dhe protestuesit kanë filluar të shpërndahen.