Miroslav Lajçak e ka mbyllur vizitën dyditore në Kosovë, pasi takoi të gjithë akterët institucional, politik e jopolitik, përfshirë edhe të gjithë ambasadorët e akredituar në Republikë.

Në një postim në orët e vona në Twitter, Përfaqësuesi special i Bashkimit Evropian për dialogun Kosovë-Serbi dhe çështje të tjera rajonale të Ballkanit Perëndimor, u shpreh se e kishte informuar komunitetin ndërkombëtar për hapat e ardhshëm dhe pritjet rreth dialogut mes Kosovës dhe Serbisë.

“E fundit, por jo më pak e rëndësishme, e informova komunitetin ndërkombëtar në Kosovë për gjendjen e dialogut, hapat e ardhshëm dhe pritjet tona për ditët dhe javët në vijim. Mirënjohës për interesimin dhe mbështetjen e tyre”, shkroi Lajçak.

Përveç takimeve me krerët shtetërorë, Lajçak shkoi edhe tek partitë opozitare të cilët kanë shprehur rezervat e tyre për planin e BE-së për normalizimin e marrëdhënieve mes dy vendeve.

Gjithashtu, Lajçak ka zhvilluar takime edhe me Listën Serbe dhe shefin e UNMIK-ut e të EULEX-it si dhe komandantin e KFOR-it.

Lajçak qëndroi për dy ditë në Kosovë një javë para takimit në Ohër ku pritshmëritë janë që të dakordohet mbi udhërrëfyesin e zbatimit të planit të Bashkimit Evropian për dialogun Kosovë-Serbi.