Dhjetë ditë pas vrasjes së Olvier Ivanoviqit, partia e tij “Liria, Demokracia, Drejtësia”, po kërkon informacione të reja në lidhje me rastin.

Nënkryetarja e kësaj partie, Ksenija Bozhoviq ka thënë për Novosti se janë marrë në pyetje nga policia, por që atyre nuk i janë dhënë informacione të reja.

“Në vend të përgjigjeve dhe informacioneve konkrete për hetimet, sekretari dhe unë u morëm në pyetje për më shumë se dy orë në cilësinë e dëshmitarëve. Kur kemi pyetur se deri ku kanë arritur hetimet, ata na thanë se po punojnë me vrull”, tha Bozhoviq, transmeton lajmi.net

Ajo tutje ka deklaruar se është e çuditshme si ky rast nuk është adresuar nga ndërkombëtarët.

“Pse KFOR-i, EULEX-I janë të heshtur, pse Ambasada e Amerikës ka heshtur për këtë vrasje. E njejta gjë me ambasadën gjermane. Ne insistojmë që popullit t’i tregohet sa më shpejt të jetë e mundur, kush dhe si na kërcënon”, tha nënkryetarja e partisë “Liria, Demokracia, Drejtësia”.

Ndërkaq Prokuroria e Shtetit ka thënë për lajmi.net se kurdo që ka të reja rreth vrasjes së Ivanoviqit, opinioni do të njoftohet me kohë. /Lajmi.net/