Një tentativë për futjen e kontrabandës në Qendrën Korrektuese të Dubravës është parandaluar nga Shërbimi Korrektues i Kosovës, pas një aksioni të organizuar në bashkëpunim me Njësinë e Inteligjencës dhe Departamentin e Sigurisë së këtij institucioni.

Siç ka bërë të ditur Shërbimi Korrektues, operacioni është realizuar pas pranimit të informacioneve proaktive dhe ka rezultuar me gjetjen e pesë qeseve të zeza, të mbështjella e të izoluara me izolir të tejdukshëm.

Brenda tyre janë zbuluar:

Lëndë e dyshuar narkotike, e ndarë në disa njësi, me peshë totale prej 98 gramësh (me mbështjellës);

Pesë telefona të markës Samsung, prej të cilëve njëri kishte SIM kartelë të operatorit IPKO, si dhe dy SIM kartela të papërdorura.

Sipas njoftimit, ky operacion është dëshmi e angazhimit të vazhdueshëm të Shërbimit Korrektues për të parandaluar futjen e materialeve të ndaluara dhe për të siguruar një ambient të sigurt brenda institucioneve korrektuese.

“Shërbimi Korrektues i Kosovës do të vazhdojë me vendosmëri zbatimin e masave të rrepta të kontrollit, me qëllim parandalimin e çdo tentative për futje të paligjshme të materialeve të ndaluara brenda institucioneve korrektuese”, thuhet në njoftim.