Ish-kryeministri i Shqipërisë, Pandeli Majko, ka reaguar pas deklaratave të ministres serbe Snezhana Paunoviç, e cila ka thënë se në vitin 1998, po të ishte në vendin e Sllobodan Millosheviçit, do të kishte ndërmarrë spastrimin etnik të Kosovës.

Majko e ka cilësuar deklaratën e ministres serbe si një shqetësim për politikën e Beogradit dhe një pengesë në rrugën e integrimit evropian të Serbisë.

Sipas tij, fjalët e Paunoviç tregojnë se ide të lidhura me politikat e kohës së Millosheviçit vazhdojnë të jenë të pranishme në disa qarqe politike serbe.

“Trashëgimtarët e Millosheviçit flasin ende për spastrim etnik”, ka shkruar Majko në reagimin e tij, duke e lidhur deklaratën me të kaluarën e luftës në Kosovë.

Ai ka theksuar se kujtesa e konfliktit dhe qëndrimet e tilla politike e bëjnë më të vështirë procesin e pajtimit dhe të bashkëpunimit në rajon.

Majko ka përmendur gjithashtu proceset gjyqësore në Hagë, duke argumentuar se deklarata të tilla rikthejnë debatet për përgjegjësinë politike dhe krimet e kryera gjatë luftës në Kosovë.

Deklarata e ministres serbe ka shkaktuar reagime të shumta në Kosovë dhe Shqipëri, ndërsa autoritetet dhe figura politike kanë kërkuar distancim nga retorika që lidhet me politikat e viteve ’90.

LEXO EDHE:

Deklaratë skandaloze nga ministrja e Serbisë për spastrim etnik të Kosovës