Koalicioni PAN do të marrë pjesë në seancën e nesërme, datë kjo e propozuar nga vetë ata, dhe e përkrahur nga subjektet tjera politike të përfaqësuara në Kuvendin e Kosovës.

“Nesër PAN-i do të marrë pjesë në seancë, por përfundimisht do të merret vesh sonte vonë, ose nesër paradite,” se çfarë do të vendosë, i kanë thënë arbresh.info burime brenda këtij koalicioni.

Sipas të njëjtit burim, në seancë mund të kërkohet që të shtyhet data për votimin e kryetarit të Kuvendit dhe nënkryetarëve, apo konkretisht zgjedhjen e kryesisë së Kuvendit.

Zgjidhje për të dalë nga kjo situatë, ky burim thotë se mbeten zgjedhjet e jashtëzakonshme.

“Nëse nesër AKR nuk shprehë mbështetjen për PAN-in, zgjidhja e vetme mbeten zgjedhjet e jashtëzakonshme.”

Më herët, gjatë ditës, lideri i AAK-së, Ramush Haradinaj, tha se ekzistojnë gjasat reale të mos mund të mbyllet çështja e konsolidimit të Legjislaturës së Gjashtë të Kuvendit të Kosovës.

“Këto shtyrje edhe pse janë humbje kohe e fitojnë një aspekt tjetër që është një nisje më gjithëpërfshirëse, që mundet me i ba ballë proceseve në vend,” është shprehur gjatë ditës Haradinaj.

Sipas analistëve, në këtë situatë, PAN-i duhet t’i drejtohet Gjykatës Kushtetuese për të plotësuar vendimin e mëparshëm.

“Dhe ta precizojë që mos ushtrimi i kësaj të drejte për motive të interesit politik duhet t’i humbet”, është shprehur analisti Donik Sallova për “arbresh.info”.

Sipas analistit Imer Mushkolaj, qëllimi i PAN-it është që të shkojë në zgjedhje të reja, pas dështimit për një koalicion me AKR-në, e Behgjet Pacollit.

“Nëse PAN-i vazhdon me këtë idenë e bllokimit të seancave, duket se qëllimi i tyre është që vendi të shkojë në zgjedhjet e reja pavarësisht se si do të dalin nga ato zgjedhje”, tha ai.

Kuvendi i Kosovës ka dërguar njoftimin se nesër do të mbahet vazhdimi i seancës konstituive të Kuvendit të Kosovës, të dalë nga zgjedhjet e 11 qershorit.

Pika e vetme e rendit të ditës së seancës do të jetë: Zgjedhja e Kryetarit të Kuvendit dhe e nënkryetarëve të Kuvendit, shkruan arbresh.info.

Seanca e nesërme është kërkuar në këtë datë nga koalicioni PAN pas bojkotimit që i ka bërë katër herë radhazi asaj që nga 3 gushti i këtij viti./arbresh.info/