Shefi i Grupit Parlamentar të LAA, Avdullah Hoti ka kritikuar koalicionin PAN dhe Lëvizjen Vetëvendosje se po e shfrytëzojnë Kuvendin për motive të ulëta të tyre.

Hoti gjatë një konference për media tha se VV në mandatin e kaluar ka shkuar shumë larg për të arritur në pushtet, duke sulmuar siç tha, kryeministrin Isa Mustafa dhe familjen e tij, shkruan arbresh.info.

Ai fajësoi kryetarin e atëhershëm të Kuvendit, Kadri Veselin për veprimet e VV-së në legjislaturën e pestë e cila për disa seanca radhazi hodhi gaz lotsjellës në Kuvend.

“PAN dhe VV po shfrytëzojnë prapë Kuvendin e Kosovës për motive të ulëta të tyre. Vetëvendosje në mandatin e  kaluar ka shkuar shumë larg për të ardhur në pushtet duke sulmuar kryeministrin Isa Mustafa, familjen e tij dhe stafin e tij. Asnjë qeveri nga viti 1999 nuk ka qenë më shumë e sulmuar se Qeveria Mustafa. Veseli e din që kryeministri është sulmuar në Kuvend por edhe jashtë Kuvendit. Ai është përgjegjës për lejimin e futjes së gazit në Kuvend, në sallën alternative të Kuvendit sepse ka lejuar futjen e deputetëve të atëhershëm të opozitës. Ai nuk ka menaxhuar Kuvendin si duhet”, është shprehur Hoti.

Ai ka komentuar edhe akuzat e Degës së PDK-së në Prishtinë ndaj qeverisjes së Shpend Ahmetit duke thënë se PDK po e akuzon VV-në për t’ia bërë me dije se nuk janë të ndryshëm nga ata vetë./arbresh.info/

https://www.facebook.com/arbresh.info/videos/1520132408051846/