Presidentja e Kosovës, Vjosa Osmani, ka shprehur ngushëllimet e saj të thella për familjen Latifi, pas ndarjes tragjike nga jeta të Rrahim Latifit, 35 vjeç.

Në mesazhin e saj, Presidentja Osmani theksoi se humbja e jetës së një të riu është gjithmonë e rëndë, por bëhet edhe më e dhimbshme kur ndodh në rrethana tragjike.

“E nderuar Familja Latifi, me dhembje të thellë mora lajmin për humbjen tragjike të më të dashurit tuaj, Rrahim Latifi. Rrahimi u nda nga jeta në mënyrë të parakohshme, duke lënë pas dhimbje të madhe për familjen, miqtë dhe të gjithë ata që e njohën. Humbja e jetës së një të riu është gjithmonë e rëndë, por edhe më e dhimbshme kur ndodh në rrethana të tilla. Në këto çaste dhimbjeje, ju lutem pranoni ngushëllimet e mia më të sinqerta dhe lutjet për forcë e durim për ta përballuar këtë humbje të pazëvendësueshme”, ka thënë Osmani.

Trupi i pajetë i Rrahim Latifit u gjet dje në liqenin e Ujmanit, pas dy ditësh kërkime. Dyshohet se ai është mbytur pasi është hedhur nga ura./Arbresh.info