Osmani ngushëllon për ndarjen nga jeta të Fatos Nanos: Luajti rol në transformimin politik të Shqipërisë

08:40 | 1 Nëntor 2025
E.K

Presidentja e Republikës së Kosovës, Vjosa Osmani, ka shprehur ngushëllimet e saj për familjen, të afërmit dhe bashkëpunëtorët e ish-kryeministrit të Shqipërisë, Fatos Nano, i cili u nda nga jeta.

Osmani e ka cilësuar Nanon si një prej figurave kryesore të tranzicionit demokratik në Shqipëri dhe një kontribues të rëndësishëm në transformimin politik pas viteve ’90.

“Ai ishte një prej figurave të tranzicionit demokratik në Shqipëri dhe luajti rol në transformimin politik pas viteve ’90. Si themelues dhe udhëheqës i Partisë Socialiste, Fatos Nano pati rol transformues në drejtimin e saj, duke e shndërruar në një forcë moderne, evropiane dhe të përkushtuar ndaj dialogut politik. Përmes vizionit të tij, ai kontribuoi në ndërtimin e një kulture më paqësore dhe më bashkëpunuese në jetën politike shqiptare”, thuhet në njoftimin e Presidencës./Arbresh.info