Presidentja e vendit, Vjosa Osmani, i ka reaguar ashpër Bashkimit Europian për çështjen e hapjes së Urës së Ibrit.

Me anë të një postimi në Facebook, Osmani u shpreh kundër qëndrimit të BE-së ku sipas tyre kjo pikë duhet të jetë pjesë e dialogut, përcjell Arbresh.info.

Osmani theksoi se Vuqiçi nuk ka çka pyetet se kur do të hapen urat për qarkullim në Republikën e Kosovës

”Reagim ndaj deklaratës së sotme të BE-së se çështja e hapjes së urës së Ibrit duhet të jetë temë e dialogut me Serbinë. Çështja e urës nuk duhet asesi të bëhet temë e dialogut me Serbinë. Një gjë e tillë do të ishte shkelje e rëndë e sovranitetit, integritetit territorial dhe e kushtetutshmërisë në vendin tonë. Vuqiçi nuk ka çka pyetet se kur do të hapen urat për qarkullim në Republikën e Kosovës”, shkroi Osmani.

”Dialogu i vetëm që duhet të bëhet, është ai brenda Kosovës, në mes të institucioneve tona dhe partnerëve tanë të sigurisë (veçanërisht me NATO-n) në mënyrë që të ndërtohet plani i përbashkët i zbatimit për hapjen e urës për çdo qarkullim, që ka parasysh vlerësimet e sigurisë dhe interesat e qytetarëve tanë”, u shpreh Osmani./Arbresh.info