Numërimi i votave për deputetë përfundon në pesë komuna

18:15 | 14 Shkurt 2025
Q L

Komisioni Qendror i Zgjedhjeve të premten pasdite ka njoftuar se numërimi i votave për kandidatët për deputetë ka përfunduar në komunat e Hanit të Elezit, Shtërpcës, Parteshit, Ranillugut dhe Junikut.

Sipas njoftimit në Facebook, procesi i numërimit po vazhdon në 29 komuna të tjera.

Në Leposaviq, Zveçan, Zubin Potok dhe Mamushë ende nuk ka filluar numërimi.

Nga KQZ-ja është paralajmëruar se numërimi i votave nuk do të përfundojë së paku edhe 10 ditë.

Ky proces është shoqëruar me shumë probleme që nga dita kur përfunduan zgjedhjet. Sistemi i KQZ-së herë pas here ka pasur telashe.

Kryetari i këtij institucioni, Kreshnik Radoniqi, ka thënë se po presin raportin e institucioneve të sigurisë për të kuptuar më shumë rreth asaj që ka ndodhur.