Policia e Kosovës njofton se sot Njësia për Ndërhyrje të Shpejtë (NjNSH) e Policisë Kufitare të Kosovës me zyrtarët e saj, kanë realizuar patrullime me barka lundruese në liqenin e Ujmanit.

Në njoftimin e PK-së, thuhet se patrullimet e tilla përveç mbikëqyrjes së kufirit ujor parandalojnë edhe veprat penale në kufij, ofrojnë sigurinë territoriale të ujërave, parandalojnë kalimet ilegale, kontrabandimin e mallrave, peshkimin ilegal si dhe ofrojnë mbrojtjen ekologjike ujore.

“Policia e Kosovës, bazuar në kushtetutën e vendit dhe ligjin e policisë po vazhdon me përkushtim dhe profesionalizëm në realizimin e detyrave të përgjithshme të saj ku përfshihen: mbrojtja e jetës dhe pronës së qytetarëve, mbrojtja e të drejtave dhe lirive njerëzore pa dallim, parandalimi i rrezikut, hetimi dhe zbulimi i veprave penale etj, deri tek menaxhimi i kufirit shtetëror të Republikës së Kosovës”, thuhet në njoftim.

“Policia e Kosovës mbetet e përkushtuar në garantimin e sigurisë së përgjithshme në vend dhe menaxhimin e kufirit shtetëror, bazuar në mandatin e saj kushtetues dhe ligjor”, thuhet tutje në njoftim./Arbresh.info