Gjykata Themelore në Prishtinë ka bërë të ditur se Departamenti për Krime të Rënda ka caktuar masën e paraburgimit prej një muaji ndaj të pandehurit me inicialet A.P., i dyshuar për veprën penale “Vrasje e rëndë”.

Sipas njoftimit të gjykatës, vendimi është marrë pas kërkesës së Prokurorisë Themelore në Prishtinë dhe pas mbajtjes së seancës dëgjimore para gjyqtarit të procedurës paraprake.

Gjykata ka vlerësuar se ekziston rrezik real që i pandehuri, nëse lihet në liri, mund të arratiset për t’iu shmangur përgjegjësisë penale dhe të pengojë zhvillimin normal të procedurës.

Po ashtu, sipas arsyetimit të gjykatës, ekziston mundësia që ai të ndikojë në dëshmitarë ose të asgjësojë, fshehë apo falsifikojë prova që lidhen me rastin.

Palët e pakënaqura kanë të drejtë ankese ndaj këtij aktvendimi në Gjykata e Apelit, përmes Gjykatës Themelore në Prishtinë.