Pritjeve të gjata të banorëve të Rrezarit të Deçanit dhe fshatrave te tjera përreth, për ndërtimin e kanalit të ujitjes për tokat e tyre bujqësore, duket se po i shihet fundi. Kjo pasi këto ditë ka filluar ndërtimi i kanalit rreth 3 km i gjatë.

Fermerët janë shprehur të kënaqur, sepse siç thanë ata për vite me radhë tokat e tyre kanë qenë pa ujë e si pasojë edhe pa prodhime bujqësore.

“Për këtë vijë kemi pritur qe 25 vjet, s’kemi pas me çka me ujitur. Me këtë kanal ujiten qindra hektarë tokë pjellore. Tokat pjellore na u ka dashtë me i shndërruar në livadhe e kullosa për mungesë të ujit”, tha Sylejman Dervishaj, fermer.

“Kemi vuajtur shumë. Kemi pasur probleme gjithë kohën, ka dy herë në vit u dashke me e hapë këtë kanal plus deri atje në Pozhar me probleme të shumta, mirëpo tash falë Zotit po bëhet kanali i ri edhe menaxhimi ndoshta bëhet i mirë”, tha Ramiz Dervishaj fermer.

“Tokat tona është dashur me i mbjellë terrfojna ose me i lanë batall, kështu që kanali është i rëndësishëm për fshatin tonë sepse i ka dy të mira; edhe ujitet toka edhe mbushen bunaret e ujit të pijes”, tha Shaqë Dacaj, përfaqësues i fshatit.

E Rifat Stojkaj, drejtor i Bujqësisë në Deçan tha se mungesa e këtij kanali ishte një brengë jo vetëm e fermerëve të këtij lokaliteti por edhe e institucioneve komunale.

Kanali rreth 3 km i gjatë në Rrezar të Deçanit i ka gëzuar fermerët që përballen me mungesë uji për bujqësi./rtk