Kryeministri i Kosovës, Isa Mustafa, ka thënë se transformimi i FSK-së në Forca të Armatosura të Kosovës, është një proces shumë i rëndësishëm për vendin tonë dhe për stabilitetin e përgjithshëm.

Në një postim të tijin në Facebook, Mustafa ka potencuar se falë përkrahjes së pareshtur nga partnerët tanë strategjik, sidomos nga SHBA, FSK sot është një organizatë e përgatitur mirë dhe e aftë të ofrojë siguri në Kosovë dhe rajon dhe të marr pjesë në misionet paqeruajtëse jashtë vendit tonë.

Prandaj, sipas tij, transformimin e saj në Forcë të Armatosur të Kosovës “do ta bëjmë duke argumentuar se kjo është në interes të të gjithë qytetarëve të Kosovës dhe jo duke adresuar kundërshtarë të të këtij transformimi”.

“Qeveria nuk ka asnjë kushtëzim për këtë transformim, por ajo vlerëson se duhet të punojmë me tërë spektrin politik kosovar dhe me deputetët e subjekteve që përfaqësojnë popullatën joshumicë për të siguruar përkrahjen e tyre, ashtu siç e parasheh Kushtetuta e Republikës së Kosovës”, ka thënë Mustafa.

Kreu i ekzekutivit në fund theksoi se themelimi i Forcave të Armatosura të Kosovës bëhet duke rikthyer dhe duke ndërtuar besimin reciprok.